الخميس، يناير 21، 2010

الصهاينه بيدمرو غزه و إحنا معاهم

مصيبه سودا http://www.akhbarak.net/articleview.php?id=1742739 يبقى الصهاينه بيغرقوا غزه من اليمين و إحنا بنحبش عليها يالفولازى من الشمال حلو قوى متيجوا نولع فيهم ونخلص بلا داوشه يا عالم حرام فاضل إيه لسه هيتعمل و إحنا ساكتين الناس دى هتروح فين بس ولا هتعمل إيه أى حد يحط نفسه كده مكانهم و يتخيل هيكون شعوره إيه إنا لله و إنا إليه راجعون لك الله يا غزه يقينا هتفرج إن شاء الله فلما ضاقت و إستحكمت حلقاتها فرجت و كنت أظنها لا تفرج ألا إن نصر الله قريب بإذن الله .

الأربعاء، يناير 20، 2010

من يحكم مصر

قرأت كثير من الآراء فى الفترة الأخيرة أراء مختلفه لكتاب مختلفين كل واحد منهم يبث رؤيته الشخصية عن من يحكم مصر .
فهناك رأى يقول مصر يحكمها رئيسها طبعا الرئيس مبارك الذى يقوم بهذه المهمه من 29 سنه دون أن يكل أو يمل إنت بتتكلم فى إيه يا راجل دى مسأله بديهيه هى البلد دى تبقى بلد من غير فخامته دا حتى من غيره البلد تولع لا دا العالم كله يولع حكيم العرب الراجل الجامد إلى شخط فى إسرائيل فخرجت تجرى من غزه بالمشوار وكانوا لولا شخطته الميمونه فيهم هيكملو على بقتها صاحب الضربه الجويه الأولى إلى جابتلنا النصر فى أكتوبر المجيد ما إنت عارف بقى إن الكف السابق سابق و أول طلعه دايما بتبقى متعبه شوية كتر خيره الريس و الله بقاله 29 سنه تعبان معانا لكن إحنا ... إحنا ولاد كلب إحنا بنتعب الروءساء و بنعكنن عليهم اللهم إفقرنا و إغنيهم اللهم خد مننا و إديهم اللهم أنفخنا وفسيهم .

طبعا إلى فات ده رأى لكن فى رأى تانى بيقول أنا بقى أعرف إلى محدش يعرفه تصدق يا موءمن إن مصر بتحكمها السيده سوزان مبارك سيده مصر الأولا صاحبه مهرجان القراءه للجميع رئيسه الهلال الأحمر المصرى إلى بتدافع عن الحقوق و بتنصر الغلابه يا راجل دا العالم كله معترف بيها دا حتا مخلتش حته فى العالم إلا وخدت منها جايزه أو تكريم دى حتى واضحه زى الشمس أهه إنت إزاى مش واخد بالك من الموضوع ده .

و يطلع واحد تانى يقولك إيه سيبك إنت من الأونطه دى كل ده كلام فى الكلتش هو علاء مبارك إلى بيحكم مصر يا جدع دا يمتلك مصر كلها و شريك فى تلات تربع الشركات إلى فى مصر كبيره و صغيره دا حتى إشترى شقه فى إسكندريه و التانيه فى أسوان و بيفكر يفتحم على بعض دا بيعمل إلى هوا عايزه فى البلد يا راجل إنت عبيط إنت بتتكلم فى إيه دا حتى العيال الصغيره عارفة الكلام ده.

و فى رأى تانى بيقول يا عم دى ناس مش فاهمه حاجه البلدى بيحكمها جمال مبارك جماااال جمال ياعم إنتا إنت متعرفش جمال بتاع السياسات هو ده يا جدع بتاع السياسات كلها بقى إلى عمال يحط ويشيل فى سياسات البلد زى ماهو عايز و يحط و يشيل فى الوزرا زى ماهو عايز و مفيش حاجه بتحصل فى البلد اليومين دول غير بإذنه . كلام فى سرك بس متقولش لحد الريسسسسسسس أيوه الريس بيجهزه علشان يمسك مكانه بعد عمرين طوال إن شاء الله.

و فى واحد تانى بيقول كل إلى فاتوا دول جهله و لا حد فيهم فاهم حاجه البلد دى بيحكمها أحمد عز عز يا عم إنتا بتاع الدخيله القرش اليومين دول هو إلى بيحكم يا معلم و الراجل ده مش فلوس و بس دا فلوس ونفوز و مركز ملوش حل فى الحزب الحاكم دا راجل من الأخر و سمعناه بودانا فى التلفزيون بيقول لوزير العدل قول إلى إنت عايزه لكن إلى بقول عليه هو إلى هيحصل إنت مسمعتوش يا عم إنت هو إنت مبتسمعش ولا إيه .

ويطلعلى واحد تانى يقولى إإإإإإإإسكت هو انت متعلمش مصر يا كابتن دلوقتى بقت بلد بوليسيه بيحكمها البوليس أه والله يعنى حبيب العادلى دلوقتى هو إلى بيحكم و يتحكم فى مصر و متخلنيش أكلم عن الراجل ده كتير بأه ربنا يجعل كلامنا خفيف عليه الراجل ده هو إلى مكمم الشعب من يوم ما مسك لحد دلوقتى محدش عارف يفتح بقه و البلد ممسوكه بإيد من حبيب قصدى من حديد .

و يطلع واحد تانى يقولى يا عم دا كله كلام فاااااارغ كلام فارغ البلد دى بيحكمها زكريا عزمى رئيس ديوان رئيس الجمهوريه من أكتر من 25سنه دلوقتى الدنيا كلها إتغيرت و هو ثابت كالهرم متغيرش أبدا دا بقى يامعلم هو أمين سر البلد دى هو ده إلى يعرف إلى محدش يعرفه و بيفهم فى إلى محدش بيفهم فيه هو ده إلى قريب من الريس و بأه فى ودن الريس علطول و أنت عارف بقى الدوى على الودان أمر من السحر .

و واحد غيره قالى و غيره قالى أقلكم الصراحه أنا إتلخبط بقى معدتش فاهم حاجه حد يقولى بالراحه كده و يفهمنى علشان أنا فهمى على قدى البلد دى مين إلى بيحكمها بالظبط يا جدعان يعنى أوجه كلامى لمين لما أحب أكلم شعب مصر الله يرحمك يا قطز فينك دلوقتى كان زمانك حليت المشكله دى .

الثلاثاء، يناير 19، 2010

اليوم السابع | فتش عن زكى قدرة

اليوم السابع | فتش عن زكى قدرةالمقال أعجبنى فأردت أن أنقله كما هو من جريدة اليوم السابع و أضيف أننا لسنا فقط شعب زكى قدره بل شعب زكى قدره و زكى الدبور و زكى شان و فى فترة ما زكى بدر نحن تحولنا إلى شعب من الأزكياء و يبدو أن بلدنا المسكينه لم تعد نفسها لإستيعاب كل هؤلاء الأذكياء وهذا القدر الوافر من الذكاء فأصابها صدمه مضاده للذكاء فأصبحت متخلفه عقليا

الثلاثاء، يناير 12، 2010

خميرة العكننه

خبر خرج علينا أن مصر رفضت أن تدفع لقناة الجزيرة 10 مليون دولار حقوق بث مباريات البطولة الإفريقية المشاركة فيها مصر مش عارف ليه الكلام ده مش عرف يدخل دماغى الظاهر إنه كلام كبير قوى و دماغى أضيق من إنها تستوعبه يعنى مصر إلى دفعت عشرات الملايين من الدولارات علشان نقل مباريات كأس العالم إلى ملناش فيها غير حكم يتيم و حامل راية رايحين يمثلوا حضارة السبعتلاف فجأة ميزانيتها معدتش قادرة تستحمل و ظهرت الأولويات فى الصحة و التعليم و البنية الأساسية من إمتى دا إحنا لو بنفكر بالمبدأ ده على طول كان زمان حالنا غير الحال .
لكن إلى يغيظك إنه لا يبقى صحة و لا تعليم و لا بنية أساسية و لا حتى البطولة الإفريقية طيب فاضلنا إيه يعنى .
و أصبحت قناة الجزيرة هما المتوحشين الأشرار و لاد الذين صمموا على العكننه على الشعب المصرى لأغراض سياسية . بالزمة دا كلام ياجماعة أنا لا معا قناة الجزيرة و لا ضدها بس قولولى كلام معقول هو الشروط إلى طلبتها الجزيرة من مصر كانت عشان مصر لوحدها ولا دى شروط حطاها القناة لأى حد فى العالم لأغراض إقتصادية علشان يلموا فلوسهم و طبعا يكسبوا و دا من حقهم أكيد مهماش فاتحينها مؤسسه خيرية . يا عالم بقى مصر بفضائياتها و أقمارها الصناعية و إعلامها دا كله مش عارف يتعامل بفكر إقتصادى إحترافى مع الكيانات الأخرى و يخرج علينا شوبير يقول طيب أنا بقى هعرف قناة الجزيرة و هفهم الشعب المصرى إزاى يجيب البطولة ببلاش من القنوات الفرنسية باس هة . يا عم هى ناقصة فاقعه دا إحنا مفقوعين من المعلقين المصريين إلى يحرقوا الدم هنقوم نستحمل نقعد 90 دقيقة نسمع واحد عمال يرطن بالفرنساوى و يقولى أه و إيه و تف يا راجل حرام عليك .
و مش عارف إيه قناة الجزيرة دى إلى مصر بطولها و عرضها بتقول إنها السبب فى تأجيج روح الكراهية ضد مصر و حكومتها و شعبا يا عالم و الله ما يصح الكلام ده دى قناة الجزيرة دى موجوده فى دوله أصغر من مركز دكرنس دقهلية و الله العظيم عيب علينا أكن مصر مش عارفة تدافع عن نفسها قدام الجزيرة ليه يعنى بيسحروا للناس فى ودانهم و عنيهم عاملين لمصر عمل بعدم القبول من جميع أنحاء الأرض .
و أخيرا بقى قبل ما أمشى أقدر أقول ملعوبة أهى حركة ممكن تأجج مشاعر الغضب و الكراهية ضد الجزيرة من بعض السذج إلى بيصدقوا كل إلى بيقوله الإعلام المصرى و تبين إن الجزيرة عبارة عن خميرة عكننه لازم نقاطعها علشان يرجعلنا الأنس و الفرفشة تانى .
بس أعتقد إن الكلام ده لا يصدقة أى واحد بيفكر بهدوووووووووووووووء .

الاثنين، يناير 11، 2010

بسم الله أبدأ

هناك العديد من المدونات كل منها تنتهج أسلوبا معينا للتعبير عن شخصية من يدون فيها فهناك من يتبع الأسلوب الساخر أو الجاد أو البذىء أحيانا المهم أن كل شخص أصبح يجد الوسيلة التى تناسبه للتعبير عن أرائه و أفكاره .
أما بالنسبة لى فأنا أحترم بشده نظرية الموءامرة أجدها هى الأكثر إقناعا فى وقتنا هذا و بخاصة وسط هذا الزخم الإعلامى الرهيب فأنا أقرأ يوميا من الأخبار ما لا يمكن أن يقبله عقل أو منطق بل أننى قد أقرأ الخبر و ضده فى نفس الصفخة أتصدقون هذا .
أكتشفت أننى يجب أن لا أسلم عقلى للإعلام بشكل كلى يجب ألا أصدق ما يقال بشكل مباشر يجب أن أقرأ الخبر من جميع الجهات المصدرة له ثم أعيد التفكير فيه مرة أخرى بهدوووووووووووء.
هناك الكثير من النماذج التى تبين عاقبة أن تسلم عقلك و تقتنع بالكامل بكل ما يقال فى وسائل الإعلام المقرؤة و المسموعة و المرئية فهناك المثل الأمريكى و كيف أن الشعب الأمريكى مغيب بالكامل تحت سطوة إعلامه الذى يصور العرب و المسلمين مجموعة من الإرهابيين الأشرار قتالين القتلة و الأغبياء و قبيحين قليلى الذوق إختصارا نقدر نقول شمبانزى و نجد هذا واضحا بشكل بالغ فى أفلام هليود .
و هنروح بعيد ليه هناك نموذج أكثر قربا فى الزمان و المكان ما حدث بين مصر و الجزائر فى أثناءحرب 14نوفمبر2009 الماضى و ما تلاها من تبعات و كيف أن الإعلام فى كلا البلدين أجج المشاعر العدائية بين بلدين المفترض أنهما شقيقين و كيف أن نفس الوسائل الإعلامية إبتلعت كل ما قالت و شربت عليه ميه و غيرته إلى النقيض تماما فى فترة وجيزه جدا .
أيها النااااااااااس هيا بنا نرى و نسمع و نقرأ ثم نفكر بهدوووووووووووووء دعونا لا نسمح لأحد أن يعبث بعقولنا سيكون هدفى من هذه المدونة فى الأساس هو الرد على غير المنطقى من الأخبار محاولة للنقد الموضوعى و التحليل محاولة للبعد عن التعصب و العصبية محاولة للتفكير بهدوووووووووووء .