الجمعة، أبريل 16، 2010

مصر بتنضرب



إللى ضارب مش صهاينه
مش حد غيران مالحضاره و العماره و الشطاره
مش جزايرى فى تعصب متش كوره
مش أى حد ماللى نفسه يضربها ... ضرب
بس برضه بتنضرب

إللى ضارب مش شاب طايش
مش مسطول و شارب حاجه وحشه
مش غلبان و شارب من كيعانه
مش أى حد ممكن يضربها ... ضرب
بس برضه بتنضرب

إللى ضارب داس برجله على وش الحقيقه
مش عشان الحقيقه دى بغيه
مش لإنها سارقه أقوات الغلابه
مش عشان الحقيقه كانت مصاحبه كدبه خايبه
هو أصله أكل عيشه إنه يضرب آم ضرب

العجيبه مش فى قسوة إلى ضارب
مش فى إنه مهمهوش إلى بيصرخ مالألم
مش هدوؤه و هو بيغير ملامح حد تانى
مش فى تكشيرته إلى باينه رغم كل النضارات
العجيبه فاللى رايح ينضرب

صدقونى مصر مش أهرام و نيل سارح طويل
مصر مش طينه و رمله منبته جزوع نخيل
مصر مش لحظة صفا بنعيشها وقت غروب جميل
مصر هى الناس المطحونين المجروحين
لما نلقى الناس بتبكى و لا تجرى و تنضرب

تبقى مصر بتنضرب
تبقى مصر بتنضرب
تبقى مصر بتنضرب

                                                                   إيهاب أحمد عرابى 

السبت، أبريل 03، 2010

إذا عرف السبب ... بطل العجب



قرأت مثل الجميع فى الآونة الأخيرة عن الأزمه التى دارت فى مجلس الشعب بين الحزب الوطنى بقيادة أحمد عز و بين نواب المعارضه بقيادة الأخوان بخصوص الموازنه العامه للدوله و كيف أن الإخوان إعترضوا على الموازنه العامه للدوله و اعتبروا أن هناك سرقة و نهب و نوع من أنواع الموازنة الخفية و سمعت أرقام هائلة تصل إلى 1272 مليار جنيه منعرفش عنها حاجه و لا نعرف بتروح فين فى الوقت إلى عجز الموازنه فى مصر يصل ل 90 مليار جنيه فقط و بصراحه مصدقتش و متخيلتش و مفهمتش ده ممكن يكون إزاى و يمكن دار بداخلى أنه ربما الإخوان يحاولون أن يحدثوا زوبعة ليستفيدوا منها دعائيا فى الإنتخابات القادمه لإن الكلام إلى بيتقال مستحيل حد يصدقه و بينى و بينكم رغم إنى مبحبش إحمد عز ده عذرت عصبيته فى رده على الكلام إلى قاله الإخوان إلى مفيش حد ممكن يتخيله .

 لحد النهارده لما قريت هذا المقال للأستاذ فهمى هويدى ربنا يكرمه فهمنى كده بالراحة إلى مكنتش مستوعبه و لا متخيله و ياريته ما فهمنى أول مره أحس إن الجهل أحيانا بيبقى نعمه لإنه بيمنع عنك بعض الأمراض زى السكر و الضغط و كده يعنى .

عزيزى إقرأ هذا المقال و لا تتعجب فإذا عرف السبب بطل العجب .