الحكم الفيسبوكية

فى كام مره كده و أنا بافتح الفيس بوك بتاعى تنط فى دماغى فكره أقوم أصيغها كده فى شكل حكمه حلمنتيشى و أكتبها على الفيس بوك و بعدين قلت أجمع شويه من حكمى الفيس بوكية و أحطها هنا على الفيس بوك و سميتها الحكم الفيسبوكيه ...

1- لسه من شويه كنت بقلب فى التسجيلات إلى عندى على الموبايل لقيت أغنيه يا زهرة المدائن لفيروز و بعد ما سمعتها ترسخ فى داخلى أن القدس لن تتحرر إلا عندما نتوقف عن الغناء لها.

2- إلى شخص ما إللى الناس كلها بتخاف منه و هو عارف نفسه إتقى الله فشر الناس من يتقى لفحشه.

3- إلى المتعصبين فى كل أرجاء العالم :- لماذا لا تكون الجنازه حاره جدا ألا فقط عندما يكون الميت كلب .

4- بالأمس قررت أن أفكر تفكيرا عميقا جدا فى مشكلة ما تؤرقنى فجلست على أريكتى و اتكأت على وسادتى و فى الصباح إكتشفت أننى نمت نوما عميقا جدا جدا جدا.

5- إستيقظت فى الصباح على صوت المنبه كالعاده إيذانا بموعد الإستيقاظ للذهاب للعمل ... و بعد أن ضربت
المنبه بيدى عدة ضربات أملا فى إسكاته حتى سكت فاستلقيت على ظهرى مرة أخرى و أنا أقول .......
هاااااااااى ما الدنيا إلا منبه كبير!!!!!!!!!

و إلى اللقاء مع حكم فيسبوكيه جديده إن شاء الله .......

دعوة للتقوقع

رمضان كريم إحنا ما شاء الله فى العشرة الأواخر النهارده 23 رمضن الأيام الحلوه بتمر بسرعة و الواحد فى رمضان بيبقى عايز يفرغ دماغه من أى حاجه للعباده علشان ميضيعش وقته فى أى حجات جانبيه مش هيبقى فيه منها أى فايده فى الأيام المفترجه دى و أنا فضلت ملتزم بالكلام ده طول شهر رمضان و الحمد لله لحد من يومين كده حصلتلى حكايه كنت ناوى متكلمش فيها بس لما لقتنى هنفجر قررت إنى أفضفض على السريع لصديقى الإلكترونى إلى هو مدونتى إلى محدش بيقراها تقريبا غيرى .


صلو على النبى :-


من قيمة يومين كده تقريبا نزلت أصلى الفجر فى جامع جنبنا و بعد ما صلينا و الحمد لله قام واحد شيخ عليه كده علامات الصلاح و قعد يقول كلمه و بصراحة الكلمه كانت كويسه بيتكلم فيها عن الإخلاص و فضل الدعاء و بصراحة الراجل متحدث موهوب شدنى أسمعه رغم إنى كنت هموت و عايز أنام ساعتين قبل ما أروح الشغل الصبح و قعد الراجل يتكلم عن إن الواحد لازم يبدأ دايما بالسلام و يسلم و يشد بيده على يد إخوانه المسلمين و إننا لو عملنا كده تتساقط ذنوبنا كده ببساطه من بين أيدينا المتصافحة و ذكر حديث صحيح لذلك لكن فجأه الراجل بعد ما كان ماشى عدل راح حاود شمال مره واحده عامل حاتسه فجأه و بدون مقدمات قال و طبعا الكلام ده لا ينطبق على الياهود و النصارا يعنى لما يقابلك واحد نصرانى متسلمش عليه أبدا و متبدأوش باسلام أبده كما قال الرسول صلى الله عليه و سلم لحد ما هو يبدأك بالسلام و لما يبدأك بالسلام ... و قال بالنص (قوله و عليك و إتكا عليها قوى فلما يسألك إنت ليه مبتردش عليا السلام كويس قوله عشان إنت متجوزش عليك الرحمة) بس يا عم عليها و قامت النار فى جتتى و قمت فطيت خرجت من الجامع و فى أثناء ما كنت راجع البيت دخلت فى صراع كبير مع نفسى أرد عليه أقوله إيه يا عم إلى إنت بتقوله ده بس بعد تفكير عميق قلت بلاش أدخل فى مهاترات جدليه مع واحد لا هو هيقتنع بكلامى و لا أنا هقتنع بكلامه و أنا عايز أروح أنام عشان عندى شغل .


و قعدت اليومين إلى فاتو أحارب نفسى أكلمه لأ مكلموش لحد ربنا ما هدانى إنى أفرغ الكبت إلى جوايا و أرد عليه على المدونة يتيمة القراء دى .


صلوا على النبى :- 


أيوه رسول الله صلى الله عليه و سلم قال لا تبدأوهم بالسلام ده حديث صحيح بس قال كده ليه و إيه القصه و الموضوع هوا ده المهم مينفعش نقتطع كلمتين من حديث شريف و نقيم عليهم حكم شرعى لازم ناخد الموضوع ككل و نفهم مناطاته ثم ننشأ أحكامنا الشرعة بعد كده .
الحديث فيما معناه و ببساطه و الكلام لفضيلة الشيخ على جمعة مفتى الديار المصريه أتى أحد الصحابه للرسول يقوله يا رسول الله اليهود لما بنسلم عليهم بيلووا ألسنتهم بالسلام فيقولوا السام عليكم أى الموت عليكم فهل نرد عليهم يا رسول الله  يعنى نشتمهم زى ما بيشتمونا فرسول الله طبعا وراءه هم الأمه و أمور أكثر أهميه من هذا الكلام فكأنه قال له و الكلام لفضيلة الشيخ على جمعة يا سيدى متبدأهمش بالسلام أى أن هذا الحديث له مناط خاص ردا على واقعة معينه و ليس أمرا عاما و إنتهى كلام الشيخ على جمعة .


أنا بأه بقول و هقولكم مثال واحد لإن الأمثله كثيره لا تنتهى رسول الله صلى الله عليه و سلم لما ذهب ليزور جاره الياهودى الذى كان يلقى القاذورات أمام بيته لأنه وجده لم يضع القاذورات منذ فتره فذهب صلى الله عليه و سلم بنفسه ليطمئن عليه تخيل معى من فضلك رسول الله يطرق باب الياهودى ليزوره فيرد من داخل البيت صوت من الطارق  فيرد صلى الله عليه و سلم رسول الله فيفتح الياهودى الباب و يقف أمام رسول الله مذهولا منتظرا أن يلقى عليه الرسول السلام فلم يفعل فقال الياهودى السلام عليك يا رسول الله فيرد الرسول و عليك فيقول له الرجل لماذا هذا الرد  فقال له الرسول لأنه لا تجوز عليك الرحمه .... هل يمكن أن يكون هذا تصرف رسول الله صلى الله عليه و سلم لا يمكن بل لابد أنه سلم عليه و ألان له الحديث و دخل بيته و هو ليس فقط ياهودى بل ياهوديا يؤذى رسول الله شخصيا و بشكل يومى متكرر حتى دخل الرجل فى الإسلام و شهد أنه لا إلاه إلا الله و أن محمد رسول الله .


هذا هو إسلامنا هذه هى أخلاقنا إن حسن الخلق و حسن مقابلة الآخر هو عنوان إسلامنا هناك بلاد دخل فيها الإسلام دون سيف أو حرب أو غزو فقط بأخلاق التجار المسلمين الذين كانوا يمرون عليها بحسن خلقهم بحسن مقابلتهن و معاملتهم بحسن سلامهم بقدرتهم على التعايش مع الآخر و التأثير فيه بقدرتهم على أن يربحوا حب و ثقة الآخر سواء أن كان ياهوديا أو مسيحيا أو بوذيا أو هندوسيا أو ماجوسيا سواء كان شرقيا أو غربيا أو شماليا أو جنوبيا .
أيها الناس تخيلوا رد فعل النصرانى الذى يسمع هذا الكلام من إبن بلده الذى يعش معه فى وطن واحد من جاره الذى يراه أمامه ليل نهاركيف سيكون شعوره لكى تعرف شعوره ضع نفسك مكانه و إستمع بأذنك لهذا الكلام يقال عليك و اعلم أن ما ستشعر به هو تماما ما يشعر به . ليس هكذا ننشر ديننا إنها دعوه للتقوقع دعوة للكراهيه دعوة ليست من الإسلام فى شئ ما هكذا تتقدم الأمم فلك الله يا مصر .    

أقوال مأثورة

على طريقة الأستاذ حمدى قنديل و جدت أثناء تصفحى للمدونات المختلفة و الفيس بوك و التويتر كثيرا مما يصلح أن يكون أقوال مأثورة فقررت أن أشاركها مع الآخرين المتابعين لمدونتى إلى هما قليلين جدا لدرجة إنى حاسس إنى فى المدونة دى كإنى باتكلم مع نفسى بس زى بعضه أهو الواحد يتكلم مع نفسه أحسن ما ينفجر برضه مع نفسه.

القول المأثور الأول :-
الآن لكى تستطيع أن تعبر عن غضبك من الإحتلال و من النظام الحاكم فعليك أن تمتلك مدونه و حجر و حذاء.
من مدونة أحمد الصباغ

القول المأثور الثانى :-
شخص ما  : إيه رأيك تشترك معانا فى صفحة مدونة أحه يا مصر 
أنا           : مبحبش الألفاظ الخارجه و قلة الأدب و بفضل إنى أعبر عن رأيى بشكل محترم 
شخص ما  : لا إنت فاهم غلط يا إيهاب دى أقل حاجه هو إنت مشفتش إلى حصل لخالد سعيد على العموم إنت حر.
حوار دار بينى و بين صديق لى معرفوش على شات الفيس بوك

القول المأثور الثالث :-
الإنتخابات صوريه و مع ذلك فإن أجمل ما فيها هو إصرارهم أن يدخل المواطن وراء الستار ليقضى حاجته ثم يضعها فى الصندوق    ( جلال عامر )   من مدونة حكاوى آخر الليل

القول المأثور الرابع :-
صحيح الندل لما يحتكم يقدر و لا يعفيش   ( نواره نجم )
من مدونة جبهة التهييس الشعبية

القول المأثور الخامس :-
هل تعرف ما الغريب فى مصر يا خالد ؟ الغريب أنك لا تعرف أبدا السبب فى وصولك لمكانة جيدة ، أو إنحدارك لمكانة سيئة .. 
من تدوينة ( خالد سعيد .. بعد التحية ) مدونة دماغى

القول المأثور السادس :-
كل حلكة ليل ما هى إلا إقترابة فجر .. يعنى هانت يا جماعة .
من مدونة الفجرية

القول المأثور السابع :- 
لقد سئمنا أكاذيبكم
رجب طيب أردوغان موجها كلمته لإسرائيل فى خطابه التاريخى فى البرلمان التركى بعد الإعتداء الصهيونى على قافلة الحرية


و أختم بها هذا البوست و إن شاء الله هجبلكم كلمات مأثورة تانية فى بوستات تانية .

ليست نقطه × بحر !!! لكنها نقطه = بحر

هذه التدوينة من مدونة أنا و هؤلاء نقلتها كما هى لما بها من معلومات مفيده للجميع فقط وضعت عنوان يناسب المعنى من وجهة نظرى و شكر خاص لصاحب المدونة و للأستاذه نوارة نجم صاحبة مدونة جبهة التهييس الشعبية لنشرها لهذه المدونات ذات الافكار البناءة .

بسم الله الرحمن الرحيم 

الاخوة الاعزاء بعد توقف عن الكتابة لشهرين بمنتهي الصراحة والوضوح وبدون مقدمات امتنا اليوم تقف علي المحك وبمعني ادق اكون او لا اكون 
إما ان اواجه هذا الخطر الرهيب القادم او ادفن رأسي في الرمال مثل النعام ايهما تختار لا يهم ولكن لا تأخذ قرارك قبل ان تعطي نفسك فرصة لقراءة السطور القادمة بدقة وتمعن وبعدها اختر ما تشاء فانت حر. 

الماء هو أساس الحياة قال تعالي (وجعلنا من الماء كل شيء حي) صدق الله العظيم وامة بدون مصدر ماء هي مجرد صحراء جرداء عاجلا ام اّجلا ستفني 

ولندخل في صلب الموضوع الذي هو بعيدا عن المشكلة تماما لكل من يختيل اني سأدتحدث عن دور الحكومات في ازمة مياه النيل اقول له خاب ظنك 
انا سأتحدث عن اللاعب الاساسي في هذه المشكلة (الشعب المصري) نعم الشعب الذي يستهلك الماء بجهل اكثر من انسان الكهف 

سأحدد النقاط التي سأتحدث فيها 
1- مصادر المياه في مصر 
2- تقسيم المياه في مصر.
3- معدل استهلاك الفرد في مصر للمياه.
4- حصة الفرد من مياه مصر . 
5- ماذا علينا ان نفعل؟؟ 

اولا:- تتلخص مصادر المياه عامة في العالم الي (مياه الانهار ومياه الامطار ومياه التدوير الصحي والزراعي) وتعرف باسم مياه الجريان السطحي و(المياه الجوفية) وتعرف باسم مياه الجريان الغير سطحي 

في مصر تتكون المياه من جميع هذه المصادر حيث هناك نهر النيل(أطول انهار العالم) والامطار فيما يعرف بمناخ البحر متوسط وعائد تدوير مياه الصرف الصحي والصرف الزراعي ونأتي لاكبر لاعب في هذه المجموعه (نهر النيل) 

نهر النيل:- له رافدين رئيسيين النيل الابيض والنيل الازرق وينبع النيل الابيض عند البحيرات الكبري في وسط افريقيا واهم البحيرات بالطبع بحيرة فيكتوريا والنيل الازرق و يشكل نسبة (80-85%) من المياه المغذية لنهر النيل، ولكن هذه المياه تصل إليه في الصيف فقط بعد الأمطار الموسمية علي هضبة إثيوبيا، بينما لا يشكل في باقي أيام العام نسبه كبيرة حيث تكون المياه فيه ضعيفة أو جافه تقريبا.

وبعد اتحاد النيلين الأبيض والأزرق ليشكلا معا النيل، لا يتبقي لنهر النيل سوي رافد واحد لتغذيته بالمياه قبل دخوله مصر ألا وهو نهر عطبرة والذي يبلغ طول مساره 800 كم (500 ميل) تقريبا. ينبع هذا النهر من المرتفعات الإثيوبية أيضا، شمالي بحيرة تانا، ويتصل بنهر النيل علي مسافة 300 كم (200 ميل) بعد مدينة الخرطوم. 

ثانيا:- تقسيم مياه مصر كلها 

تنقسم نسب مياه مصر الي الاتي التي تصل نسبتها حاليا الي 69.9 مليار متر مكعب من المياه سنويا 

1- 55.5 مليار متر مكعب من مياه النيل 
2- 6.1 مليار متر مكعب من المياه الجوفية 
3- 5.7 مليار متر مكعب من تدوير مياه الصرف الزراعي 
4- 1.3 مليار متر مكعب من تدوير مياه الصرف الصحي 
5- 1.3 مليار كتر مكعب من مياه الامطار 
اذن النيل هو اهم عنصر للمياه في مصر . 

3- معدل استلاك الفرد للمياه في مصر:- 

تعتبر نسبة استلاك الفرد المصري للمياه هي أعلي نسبة في العالم حيث يستهلك الفرد في الاسكندرية 400 لتر يوميا وفي القاهرة 360 لتر يوميا بينما متوسط استهلاك الفرد من المياه على مستوى العالم لا يزيد عن 200 لتر يوميا ، وفى الدول الأوربية ما بين 140 و150 لترا من المياه فى اليوم وهذا دليل قاطع علي الاستهتار والتبذير في مصر. 

4- حصة الفرد من مياه مصر:- 

هناك انخفاض في نصيب الفرد من المياه في مصر سنويا بسبب محدوديتها حيث كان 5084 مترا مكعبا عام 1897 ووصل إلى 1863 مترا مكعبا عام 1960 ثم تناقص عام 2000 ووصل إلى 957 مترا مكعبا ، ويبلغ حاليا 842 مترا مكعبا و هناك فاقدا كبيرا فى المياه المستخدمة فى قطاعى الصناعة والاستخدامات المنزلية وذلك بخلاف الفاقد من مياه الرى فى القطاع الزراعى . 

قبل ان ادخل علي نهاية المقال احب ان اقول ان مصر كانت حتي سنوات قليلة مضت تستخدم الفائض من حصة السودان من المياه قبل بناء السودان لسد مروي 
5- ماذا علينا أن نفعل:- 
لنعرف ماذا نفعل علينا ان نعرف نسبة الاستهلاك الحقيقي للمياه وفيما تستهلك: 

إن اجمالى الكميات المستخدمة من المياه تصل إلى 67.6 مليار متر مكعب سنويا بواقع 54 مليار متر مكعب في القطاع الزراعي و 6.5 مليار متر مكعب في القطاع المنزلي و 6.1 مليار متر مكعب في القطاع الصناعي و 1 مليار متر مكعب من المياه في الكهرباء والملاحة ويفيض 2.3 مليار متر مكعب من المياه سنويا 

والان لنقسم الاستهلاك لاجزاء: 
1- استلاك القطاع المنزلي:- 6.1 مليار متر مكعب سنويا 
اذا استطعنا تقليل الاستهلاك المنزلي الي 200 لتر لكل يوم كدول العالم المتحضر اذا نكون استطعنا توفير 3 مليار متر مكعب سنويا اي ما يكفي من احتياجاتنا المنزلية للعام القادم كيف هذا تابع القادم 

هل تعلم كم مقدار المياه المفقوده من الحنفيات والسيفونات التالفه ؟؟؟ 
1- كل نقطه تنزل من الحنفية كل ثانيه نفقد 4 لتر / يوم 2- كل 2 نقطه تنزل من الحنفية كل ثانيه نفقد 14 لتر / يوم 
3- تتابع نقط المياه نفقد 91 لتر / يوم 4- معدل إنسياب المياه بسمك 1.5 مم نفقد 320 لتر/ يوم 5- معدل إنسياب المياه بقطر 2 مم نفقد 980 لتر / يوم 6- معدل إنسياب المياه بقطر 5 مم نفقد 1600 لتر / يوم 7- معدل إنسياب المياه بقطر 6 مم نفقد 3500 لتر / يوم 

وكذلك هذه بعض الافكار ايضا للترشيد :

- يفضل ري الحديقة في الصباح الباكر، أو في المساء للحد من تبخر الماء، خصوصاً خلال أشهر الصيف الحارة.

- بدلاً من استعمال الخرطوم لغسل سيارتك، حاول استعمال دلو واحد من الماء.

- من الأفكار الجيدة أن تغسل سيارتك فوق، أو بجوار عشب حديقة المنزل كي لا يذهب فائض الماء سدى.

- لا تستعمل المرشات التي تتسبب في هدر الماء، واستخدم نظام التقطير في سقي الأشجار.

- عند تصميم حديقتك، اختر الفسائل المحلية، لأنها تتطلب كمية أقل من الماء.

في المطبخ

- عند غسل الأواني يدوياً، أغلق الحوض بالسدادة للاحتفاظ بالماء.

- استخدم غسالة الصحون (الجلاية) فهي تستهلك كمية ماء أقل من الغسل اليدوي.

- ضع حملاً كاملاً عند استعمال غسالة الصحون، أو غسالة الملابس.

- ابحث عن مواضع التسرب والحنفيات التي تتسرب منها المياه، وقم بصيانتها.

- استعمل أجهزة توفر في استهلاك المياه مثل صنابير المطبخ الحافظة للمياه.

في دورة المياه

- خلال الاستحمام، أو الحلاقة، أو غسل الأسنان، لا تترك الماء جارياً إلا عند استخدامه فعلياً.

- استعمل مرش استحمام فعالاً يغطي بالماء أكبر مساحة ممكنة، ويوفر في استهلاك المياه إلى أقصى حد ممكن.

- أحكم إغلاق الحنفيات، لمنعها من التقطير. 
- يستهلك (الدش) كمية ماء أقل بكثير من الاستحمام في حوض ممتلئ.

2- بالنسبة للقطاع الصناعي وقطاع الكهرباء فالنسبة معقولة في مصر وان كان بالامكان تقليلها اكثر بواسطة مهندسي الميكانيكا -للاسف ليس تخصصي- 

3- بالنسبة لقطاع الزراعة :- 54 مليار متر مكعب سنويا 
الحلول كثير ولكني سأضع الاقل تكلفة من واقع خبرتي المحدودة وان كنا نحتاج الي مهندس زراعي لتطوير التوفير بها 

الري السطحي المطور:

وهي التسوية الدقيقة لسطح التربة التي يمكن بواسطتها أن نجعل جميع النقاط في الحقل متساوية الارتفاع بالنسبة لنقطة اعتبارية وبحيث لا يتجاوز الفرق في 80% من النقاط عن ± /1.5 / سم وإلا تعتبر عندها التسوية غير مقبولة:

الميزات الرئيسية للري السطحي المتطور:

1. رفع كفاءة استخدامات المياه حوالي 20-25 % .
2. التوزيع الأمثل لمياه الري بشكل متساوي على سطح مجموع المساحة المروية بما ينتج تجانساً في النموات الخضرية وتحسين إنتاجية المحاصيل.
3. تقليل الفاقد في مياه الري وبالتالي تخفيض الضغط على شبكات المصارف.
4. رفع كفاءة الأرض الزراعية.

انتهي بحمد الله وتوفيقه وفي النهاية احب اشكر مدونة جبهة التهييس الشعبية لصاحبتها الاستاذة نوارة نجم للمجهود المبذول في الحملة 

وأظن بعد المقال ده الي مش هيوفر هنحاكمه محاكمة عسكرية بتهمة الخيانة العظمي .

تضامنا مع زعيمة جبهة التهييس الشعبية

تضامنا مع الإخت نوارة نجم زعيمة جبهة التهييس الشعبية فى مسألة ترشيد إستهلاك المياه عندى إقتراحين مهمين جدا و أنا فى رأيي إنهم من أهم أسباب إهدار المياه .

1- السباكة البايظة إلى فى بيوت كل المصريين يا ترى كام بيت فى مصر فيه حنفية بتنقط أو لى سخان بيخر أو كومبنيشن حمام بيسرب أعتقد إنى غير مبالغ حين أقول إن مش أقل من 75% من بيوتنا فى مصر كده و لإن الميه متاحة و رخيصة و مفيش مشاكل فى وجودها فمحدش بيهتم قوى إنه يصلحها أعتقد إننا يجب أن نركز فى حملة توعيتنا على النقطة دى ليكن شعارنا .

(عزيزى المواطن صلح حنفيتك إلى بتنقط قبل ما تخلص منها النقط ) .

2- فى المساجد فى الميضه بتاع المساجد أكاد أجزم إن 90% من مساجدنا فيها فى كل ميضه ما لا يقل عن حنفيتين ضاربين أو على الأقل بينقطوا و أنا أقترح نشر حملة توعية للقائمين على المساجد بجمع تبرعات بسيطة تكون مخصصة لإصلاح سباكة المساجد و تأمينها و تحديثها إلى مكونات أقوى و أفضل لضمان تحملها للإستهلاك الدائم فى المساجد و ليكن شعارنا .

( حب الرسول فى إتباع سنته و قد قال صلى الله عليه و سلم لا تسرف فى الماء و لو كنت على نهر جارى ) .

و أنا سوف أشارك بإذن الله بقوة و بفاعلية فى هذا الموضوع الهام و أنا تم توجيه دعوة لى لم يحدد موعدها بعد على الفيس بوك من مكتبة بوكس أند بينز عندنا فى المنصورة لندوة لمناقشة أفكار لإعادة تطوير و تحديث بلدنا المنصورة و أنا قبلت الدعوة فى إنتظار تحديد موعد الندوة و سوف أطرح فيها الأفكار الخمسة إلى طرحتهم الأخت نوارة نجم فى البوست بتاعها و أيضا الفكرتين إلى قلتهم دلوقتى و أى أفكار أخرى أحصل عليها فى هذا الموضوع بإذن الله و الله الموفق .

مصر بتنضرب

إللى ضارب مش صهاينه

مش حد غيران مالحضاره و العماره و الشطاره

مش جزايرى فى تعصب متش كوره

مش أى حد ماللى نفسه يضربها ... ضرب

بس برضه بتنضرب

إللى ضارب مش شاب طايش

مش مسطول و شارب حاجه وحشه

مش غلبان و شارب من كيعانه

مش أى حد ممكن يضربها ... ضرب

بس برضه بتنضرب

إللى ضارب داس برجله على وش الحقيقه

مش عشان الحقيقه دى بغيه

مش لإنها سارقه أقوات الغلابه

مش عشان الحقيقه كانت مصاحبه كدبه خايبه

هو أصله أكل عيشه إنه يضرب آم ضرب

العجيبه مش فى قسوة إلى ضارب

مش فى إنه مهمهوش إلى بيصرخ مالألم

مش هدوؤه و هو بيغير ملامح حد تانى

مش فى تكشيرته إلى باينه رغم كل النضارات

العجيبه فاللى رايح ينضرب

صدقونى مصر مش أهرام و نيل سارح طويل

مصر مش طينه و رمله منبته جزوع نخيل

مصر مش لحظة صفا بنعيشها وقت غروب جميل

مصر هى الناس المطحونين المجروحين

لما نلقى الناس بتبكى و لا تجرى و تنضرب

تبقى مصر بتنضرب

تبقى مصر بتنضرب

تبقى مصر بتنضرب

                                                                   إيهاب أحمد عرابى