إللى ضارب مش صهاينه
مش حد غيران مالحضاره و العماره و الشطاره
مش جزايرى فى تعصب متش كوره
مش أى حد ماللى نفسه يضربها ... ضرب
بس برضه بتنضرب
إللى ضارب مش شاب طايش
مش مسطول و شارب حاجه وحشه
مش غلبان و شارب من كيعانه
مش أى حد ممكن يضربها ... ضرب
بس برضه بتنضرب
إللى ضارب داس برجله على وش الحقيقه
مش عشان الحقيقه دى بغيه
مش لإنها سارقه أقوات الغلابه
مش عشان الحقيقه كانت مصاحبه كدبه خايبه
هو أصله أكل عيشه إنه يضرب آم ضرب
العجيبه مش فى قسوة إلى ضارب
مش فى إنه مهمهوش إلى بيصرخ مالألم
مش هدوؤه و هو بيغير ملامح حد تانى
مش فى تكشيرته إلى باينه رغم كل النضارات
العجيبه فاللى رايح ينضرب
صدقونى مصر مش أهرام و نيل سارح طويل
مصر مش طينه و رمله منبته جزوع نخيل
مصر مش لحظة صفا بنعيشها وقت غروب جميل
مصر هى الناس المطحونين المجروحين
لما نلقى الناس بتبكى و لا تجرى و تنضرب
تبقى مصر بتنضرب
تبقى مصر بتنضرب
تبقى مصر بتنضرب
إيهاب أحمد عرابى
المشاركات
هناك تعليقان (2):
متهيألي موضوع المدونات لسه عليه شويه في مصر مش هنستحمل احنا حريه و ثوره و مدونات ...كتير الناس كده ممكن تموت من الحريه على العموم انا معاك
معلش أنا مأخدتش بالى من التعليق ده غير دلوقتى حالا أشكر عليه عموما يا أخ حارث الثورة و أحب أقولاك أن من تاريخ البوست ده هتلاقى إن أنا كاتبه قبل الثورة بسنه تقريبا على ما أعتقد يعنى فى وقت مكانش فيه أى حريه من أى نوع و لو تلاحظ أنا مكتبتش بعد الثورة غير تدوينتين فقط و بعدين بطلت لإنى لقيت ناس كتير بتتكلم أو بمعنا أصح كل الناس بتتكلم فحسيت إن كلامى مش مهم فبطلت و فضلت أقرأ أكثر فأنا أعتقد إن هذا أفضل فى رأييى و ربما أجدى
إرسال تعليق