الأربعاء، يناير 20، 2010

من يحكم مصر

قرأت كثير من الآراء فى الفترة الأخيرة أراء مختلفه لكتاب مختلفين كل واحد منهم يبث رؤيته الشخصية عن من يحكم مصر .
فهناك رأى يقول مصر يحكمها رئيسها طبعا الرئيس مبارك الذى يقوم بهذه المهمه من 29 سنه دون أن يكل أو يمل إنت بتتكلم فى إيه يا راجل دى مسأله بديهيه هى البلد دى تبقى بلد من غير فخامته دا حتى من غيره البلد تولع لا دا العالم كله يولع حكيم العرب الراجل الجامد إلى شخط فى إسرائيل فخرجت تجرى من غزه بالمشوار وكانوا لولا شخطته الميمونه فيهم هيكملو على بقتها صاحب الضربه الجويه الأولى إلى جابتلنا النصر فى أكتوبر المجيد ما إنت عارف بقى إن الكف السابق سابق و أول طلعه دايما بتبقى متعبه شوية كتر خيره الريس و الله بقاله 29 سنه تعبان معانا لكن إحنا ... إحنا ولاد كلب إحنا بنتعب الروءساء و بنعكنن عليهم اللهم إفقرنا و إغنيهم اللهم خد مننا و إديهم اللهم أنفخنا وفسيهم .

طبعا إلى فات ده رأى لكن فى رأى تانى بيقول أنا بقى أعرف إلى محدش يعرفه تصدق يا موءمن إن مصر بتحكمها السيده سوزان مبارك سيده مصر الأولا صاحبه مهرجان القراءه للجميع رئيسه الهلال الأحمر المصرى إلى بتدافع عن الحقوق و بتنصر الغلابه يا راجل دا العالم كله معترف بيها دا حتا مخلتش حته فى العالم إلا وخدت منها جايزه أو تكريم دى حتى واضحه زى الشمس أهه إنت إزاى مش واخد بالك من الموضوع ده .

و يطلع واحد تانى يقولك إيه سيبك إنت من الأونطه دى كل ده كلام فى الكلتش هو علاء مبارك إلى بيحكم مصر يا جدع دا يمتلك مصر كلها و شريك فى تلات تربع الشركات إلى فى مصر كبيره و صغيره دا حتى إشترى شقه فى إسكندريه و التانيه فى أسوان و بيفكر يفتحم على بعض دا بيعمل إلى هوا عايزه فى البلد يا راجل إنت عبيط إنت بتتكلم فى إيه دا حتى العيال الصغيره عارفة الكلام ده.

و فى رأى تانى بيقول يا عم دى ناس مش فاهمه حاجه البلدى بيحكمها جمال مبارك جماااال جمال ياعم إنتا إنت متعرفش جمال بتاع السياسات هو ده يا جدع بتاع السياسات كلها بقى إلى عمال يحط ويشيل فى سياسات البلد زى ماهو عايز و يحط و يشيل فى الوزرا زى ماهو عايز و مفيش حاجه بتحصل فى البلد اليومين دول غير بإذنه . كلام فى سرك بس متقولش لحد الريسسسسسسس أيوه الريس بيجهزه علشان يمسك مكانه بعد عمرين طوال إن شاء الله.

و فى واحد تانى بيقول كل إلى فاتوا دول جهله و لا حد فيهم فاهم حاجه البلد دى بيحكمها أحمد عز عز يا عم إنتا بتاع الدخيله القرش اليومين دول هو إلى بيحكم يا معلم و الراجل ده مش فلوس و بس دا فلوس ونفوز و مركز ملوش حل فى الحزب الحاكم دا راجل من الأخر و سمعناه بودانا فى التلفزيون بيقول لوزير العدل قول إلى إنت عايزه لكن إلى بقول عليه هو إلى هيحصل إنت مسمعتوش يا عم إنت هو إنت مبتسمعش ولا إيه .

ويطلعلى واحد تانى يقولى إإإإإإإإسكت هو انت متعلمش مصر يا كابتن دلوقتى بقت بلد بوليسيه بيحكمها البوليس أه والله يعنى حبيب العادلى دلوقتى هو إلى بيحكم و يتحكم فى مصر و متخلنيش أكلم عن الراجل ده كتير بأه ربنا يجعل كلامنا خفيف عليه الراجل ده هو إلى مكمم الشعب من يوم ما مسك لحد دلوقتى محدش عارف يفتح بقه و البلد ممسوكه بإيد من حبيب قصدى من حديد .

و يطلع واحد تانى يقولى يا عم دا كله كلام فاااااارغ كلام فارغ البلد دى بيحكمها زكريا عزمى رئيس ديوان رئيس الجمهوريه من أكتر من 25سنه دلوقتى الدنيا كلها إتغيرت و هو ثابت كالهرم متغيرش أبدا دا بقى يامعلم هو أمين سر البلد دى هو ده إلى يعرف إلى محدش يعرفه و بيفهم فى إلى محدش بيفهم فيه هو ده إلى قريب من الريس و بأه فى ودن الريس علطول و أنت عارف بقى الدوى على الودان أمر من السحر .

و واحد غيره قالى و غيره قالى أقلكم الصراحه أنا إتلخبط بقى معدتش فاهم حاجه حد يقولى بالراحه كده و يفهمنى علشان أنا فهمى على قدى البلد دى مين إلى بيحكمها بالظبط يا جدعان يعنى أوجه كلامى لمين لما أحب أكلم شعب مصر الله يرحمك يا قطز فينك دلوقتى كان زمانك حليت المشكله دى .

هناك تعليقان (2):

شمس العصارى يقول...

الى بيحكم مصر حاليا الاسرة الحاكمة كلها - يعنى كل الى انت قلتهم سوزان و علاء و جمال و مبارك- بس دول الدرجة التانية من الحكم ... هو فى اولى ... اه و حياة الاخوة
اول شئ : المشروع الامريكى الصهيونى ده رقم واحد
و الاسرة المالكة لازم تمشى حسب المشروع ده ولا يمكن تحيد عنه
طيب بيحكموا ازاى
كل واحد من دول ليه شلته
يعنى مبارك شلته زكريا وحبيب و المشير و ترزية القوانين سرور مفيد و غيرهم
سوزان شلتها الوزرا - دى بتزعق للوزرا و بيبوسوا ايدها - و شوية دكاترة بيخططولها تعمل ايه كل فترة
علاء شلته جماعة الاقتصاد بس فى الدرا
جمال شلته جماعة السياسة عز و نظيف
و مسموح لكل فرد من الاسرة المالكة و شلته انهم يعملوا اى شئ فى مصر بس الشرط الوحيد ميخالفوش امريكا و اسرائيل
ـــــــــــــــــــــــــ
انا اديتك ردى
و قطز مش حينفعك دلوقتى
ههههههههههه

ehabafndy يقول...

الله ينور عليك يعنى لما أوجه كلامى لشعب مصر أكلم أوباما ونتنياهو أه كده فهمنى علشان أنا زى مقلتلك بفهم على قدى .
بس برضه الله يرحمك يا قطز كان الكلام معاه هيكون أحسن من الكلام مع أوباما ونتنياهو مهو لو عندنا قطز مكناش أصلا إتحوجنا لدول علشان يحكمونا .